Ephesians 5

Ana Kaem ko nikim te la baganakko

1Nina Kaem ko kuriang. Nu ninguru ninga kueso. Buta se nu beteso turantala nina beteralko. 2Kristus nego ko kueram iwitatala, ninimi ko kua se geragalko. Nu nanga sangukko kota ko kumik te Kaem tama tuam, se ko welang siring yawara ikiam ale ko amilmilaram.

3Bare saman katagot, ikia munan memek, se mel suen biya ko nemetam nengemang barasa ko kilek nenenga ningi me ta anirukko. Se ko munak bo ta nigiring te me aratukko. Mu awuk, nina Kaem ko kariimet kako se. 4Se dugu duap memek, den memek gusira ago, se den kolara alel memek, mu nenenga mena. Nina Kaem la amilmil tui se nup patawu se bagaralko. 5Nina te ikialko ani ninga manorsam, kariimet saman katagot betesan, kilek memek betesan, agi kariimet mel suen biya ko nomotam nongomang barasoso, mu nuna Kaem Kristus ilak nunga kingdom ningi me ta kasu nagumonko. Kari mel suen biya ko motam gomang barasoso mu kaem kawel karo tuso.

6Ninguru ikialko! Kariimet Kaem ko kuring batagorsan ale kilek memek uwutata betesan, mu Kaem nogo ko gomang magoso. Se sinar talko! Kari sikina nunga den yam yam te nengemang kulukurmon se memek beteral bore ko!

7Buta se nina kariimet kilek memek umutang betesan mu arungu me biguwuralko. 8Ulengkala nina tiromorom ningi bagaman, bare aitak nina Kristus te nikim te bagasan. Buta se nikim ko kariimet iwita bagaralko. 9Nikim ko nunguning suen biya aratoso mu munan ningo, se den nunguning, se bagara aolak diram, kilek ningo ningo umutang.

10Munan Kari Biya ko amilmilurukko mu la ko ikial ale beteralko. 11Bare tiromorom ko kilek mu nibiring tualko. Mu awuk, munan umu ko nunguning yawara bo me aratoso. Se wetang te balu paogal se menarukko. 12Nuna kilek yumura te betesan mu ani aitak me ko balikko, mu awuk, ko dolara karogo se. 13Bare nikim mu munan suen biya ko duap wetang te beteso. 14Se nikinang umutang te mel suen biya negeso se wetang te aratoso. Buta se den imi aniso:

“Ni aniwasam mu maragerko!
Kari kueman anisan bare nunga bitar ale bares se Kristus nikim kisokko.”
15Buta se ninga dugu kaora ko ninguru sinar talko. Ikia mena iwita me bagaralko. Nina kariimet ikia ago iwita bagaralko. 16Aitak ana tom memek te bagasan. Buta se munan ningo la beteralko. Tom yam ipi namuruk bore ko. 17Se nguala sipa se me bagaralko. Nina Kari Biya kilek nina beteralko kueso wore la arigal ko ikial ale te beteralko.

18Nina yu biyala nal ale me ngualaralko. Ikia boronga ninga maguwurokko. Ninga nengemang motam Kaem ko Korang Bur ago terong maukko. 19Nina ninimi karogo munakaralko mu, Israel wur se, nengeta ninga kanam mu se, wur Korang Bur ningarso mu ilu se, ninimi karogo munakaralko. Ale tom suen biya ninga nengemang te, ninga nigiring te, wur ilu se Kari Biya nup patowaralko. 20Ale tom suen biya, munan mel suen biya ko, nanga Biya Jesus Kristus nup te Ba Kaem amilmil tualko.

Nuwus kuari nunga den

21Nina Kristus nenenga Kari Biya bagoso mu ko ikia tal ale ninimi nebowa ningi bagaralko.

22Nina imet alo, nina Kari Biya ko kuring karo tusan iwitatala, ninga kari nunga nuguring karo nungaralko. 23Mu awuk, Kristus nu ana Kris alo nanga supuling bagoso iwitatala, kari mu noko nuwus ko supuling bagoso. Ana Kris alo mu Kristus ko kariimet, se nu anananga Saonga Kari. 24Se ana Kristus bowa ningi bagasan iwitatala, nina imet tom suen biya ninga kari nobowa ningi bagaralko. ▼

▼Eph 5:22-24 Imet nunga den: 1 Cor 11:3; Col 3:18; 1 Peter 3:1.

25Nina kari alo, ninga imet nunga kueralko. Kristus ana Kris alo nanga kueram, ale nago ko tam kangono te kueram iwitatala, nunga kueralko. 26Kristus uwuta beteram mu nu yu te nanga anuwa iwitata, ko den te nanga anuwok nungok, 27se karur memek, laira posara bo mena, am kako se yawarakala nunguningkiri nu koma dugu te ilak baganakko. 28Se butatala, nina kari nengeta ningimik ko sinar tasan iwitatala, ninga imet nunga kueralko. Kari bo nu ko nuwus ko kueso, mu nu kota numi ko kueso iwitata. ▼

▼Eph 5:25-28 Kari nunga den: Col 3:19; 1 Peter 3:7. Kaem ko den nangamang nungurso: John 15:3.

29Nina ikisan, kari bo kota ko kumik guang me maguwuso. Mena. Nu na naso ale kumik ko ninguru ko sinar taso, Kristus ana Kris alo nanga bitarso iwitata. 30Mu awuk, ana Kris alo mu noko kariimet biguwura suwanta. 31Buta se Kaem ko batoga iwita balam: “Kari ko nuamnuet nunga bitiruk, ale ko nuwus ilak biguwurok, ale nuna ilagala mu suwanta iwita bagomonko.” 32Den imi ko ikia biya nunguningkiri se du biya. Bare ani ikisam mu den imi Kristus se ana Kris kariimet ago nanga baluwoso.

Bare kari suwan suwan ninga karogo tala baluwoso: mu iwita, ni keta nimi ko kuesam turantala ka imet ko kuarko. Se ni imet, ka kari bowa ningi baga se ko nup patawurko.

33